Bollur, baunir og sælgæti ....Skamm og namm

Þessir dagar sem eru að ganga yfir núna bollu, sprengju og öskudagur er miklir hátíðisdagar fyrir magann, og það er spurning hvort að þeir verði ekki lagðir niður vegna þess að þetta er allt svo óhollt.

Á hverjum degi þegar ég opna fésbókar síðuna mína þá birtast þar nýjar upplýsingar um hvað sé hollt og hvað ég megi alls ekki borða og ég verð að segja að ég er orðin svo leið á þessu öllu.

Auðvitað vel ég hvað ég les þarna inni en samt ég hef velt því fyrir mér að loka bara síðunni minni út af þessu málefni, en þar sem ég er nú forvitin að eðlisfari þá hef ég ekki gert það ennþá.

Þessar upplýsingar eru oft mjög ruglandi og stangast á við hvor aðra oft á tíðum, ég hef velt því fyrir mér hvernig fólki með heilsukvíða líður með þetta og hvaða áhrif þessar upplýsingar hafa á það.

 Ég finn alveg mun á mínu heilsufari þegar ég borða skynsamlega og veit nokkrun veginn núna hvað er gott fyrir mig að borða og hvað er það ekki.  

Ég er ein af þeim sem er með ofnæmi fyrir allskonar mat og ef ég stelst  til að borða það sem ég þoli ekki þá hefur það mis alvarlegar afleiðingar fyrir mig t.d. ef ég fengi mér einn mola af hverri sort á myndinni hérna þá fengi  ég óstjónlegan kláða og útbrot og ég finn mikið fyrir því í liðamótunum mínum, en það stoppar mig samt ekki alveg því að ég stelst stundum í nammi og þá eru þessi einkenni fórnar kostnaðurinn.

Ég hef líka komist að því að ég er með mjólkur óþol en það eru örfáar tegundir t.d AB mjólk og kotasæla sem ég þoli, ef ég fæ mér rjóma og smjör sem mér finnst hvoru tveggja ótrúlega gott þá fæ ég líka útbrot og maginn lætur mig vita af sér líka.
Það eru líka fæðutegundir sem geta valdið því að ég fæ bráðofnæmi og það er ekkert grín að lenda í því og þess vegna snerti ég þær ekki.

Ég er alveg viss um að þeir sem setja inn þessar upplýsingar um matarræðið eru að gera það af góðmennsku en ekki til að pirra mig persónulega, en samt er ég búin að fá mig full sadda af öllum þessum upplýsingum um hvað sé hollt í dag en ekki á morgun, og ætla því ekki að lesa meira um þessi mál í bili.
Reyna bara að forðast  þann mat sem ég þoli illa, borða svo bara í hófi flesta daga og njóta þess sem ég borða hverju sinni og ekki fá samviskubit yfir því og þá verður þetta allt í lagi og svo hætti ég að pirra mig á þessum skrifum einn daginn og tek til við að lesa þetta allt af miklum móð.